上個禮拜, 唔知各位有無睇「今夜不設防」呢? 訪問張國榮呀! 

「亞視」嘅宣傳, 做得唔算好, 好似無咩人知咁。 

不過leslie呢一次, 真係做得好。 係個真嘅張國榮, 同大家赤裸裸咁見面。 我夠膽話, 佢上電視節目咁耐, 無一次好似我地「今夜不設防」咁多真面目, 佢簡直成個保護罩打開晒咁同大家見面。 

藝人之中, 我特別錫張國榮。 

佢靚仔, 靚仔到極! 

倪匡話佢「眉目如畫」, 一d誇張都無。 

我係偏心靚人。(自己生得醜, 無法!) 而張國榮人靚兼性格靚, 點到我唔偏心佢丫? 張國榮性格靚在佢真, 佢係一個好真嘅人。 娛樂圈, 人人講野, 都留三分。 但係張國榮有話講盡, 由心到口, 無濾嘴嘅。 呢樣野, 同我一樣, 所以特別鍾意佢。 

而且我佩服佢忍得住風風雨雨。 

忍字, 係老人家至會。 後生仔女, 有邊個忍得。 但係leslie忍得。 至少, 在公眾面前, 佢可以忍得。 (呢樣野, 我忍唔住, 通常有人媽叉我, 我認為批評得唔嘅、唔公道, 我一定媽叉番轉頭。) 求諸一個佢咁年紀嘅人, 認真難得。 

佢重好有計劃去做野, 仍知道自己條路應該點走, 一早有晒planning。 佢宣佈告別歌壇, 早有預謀, 唔係一時衝動, 雖然我地大家都好婉惜。 但係我就覺得, 佢做事能夠計劃周詳, 的確唔輕易。 

藝人之中, 無人有佢咁好體育精神。 佢對同行嘅讚譽, 係衷心嘅, 真誠嘅, 最近佢出隻碟, 向全部佢鍾意嘅同行致敬, 呢樣野, 唔係個個肯做。 肯做, 亦未必識做, 同埋有能力做得到。佢肯做, 識做兼且做得到, 叻! 醒! 架勢! 

佢隻碟, 我最近聽了成個月, 幾乎一駕車就聽。 本地歌星, 我未試過聽得咁耐。(呢樣野認真對唔住! 在音樂方面, 我口味太雜, 而且百份之百花心, 重加埋耳仔苛刻, 一個歌星聽三日, 就換。 除了leslie加拉揚指貝多芬之外, 無一隻碟, 我可以連續唔停聽, 聽足成個月都未厭。) 聽張國榮, 我足足聽了成個月, 逐個字品嚐真leslie味道。 

同佢入錄音室, 但最多take三take四, 咁就掂, 快而準而好。 

唱「當年情」, 唱「倩女幽魂」, 都係咁。 一入錄音室, 三下五落二, 大家滿意收工! 

你有要求, 佢即刻交準俾你。 

無話講! 

佢把聲, 勝在一直不停進步, 越唱越好!(所以, leslie呀leslie , 你咁早告別樂壇, 實在係浪費!) 

不過, 佢試吓做導演, 亦未必唔係好事! 佢係有品味之人, 官仔骨骨, 咁嘅導演, 香港亦好少有。 

自導自演亦妙。整套係晒佢發揮嘅戲。 

喂! rock「紅樓夢」吖! leslie做賈寶玉, 會靚到痺! 眉目如畫嘅人唔做賈寶玉, 邊個做？ 

那晚我睇番「今夜不設防」的帶, 望住佢, 想像佢扮賈寶玉時候的神態, 我已經成個人high晒! 

一路到而家, 我都重成個腦俾呢個畫面盤據住。 

佢個人貪靚。 我鍾意佢咁貪靚。 佢間屋, 好hi tech, 我笑佢連養隻狗都襯埋色。 

但係咁係好舒服, 好過癮嘅事。 靚, 可愛! 靚人, 可愛! 

所以張國榮, 我真鍾意佢! 

香港周刊 (1989)